Filmi “Dhe era qan” i Aulona Selmanit nominohet për çmim në Festivalin e Solothurnit

Në kategorinë për "Filmin më të mirë të diplomimit", është nominuar filmi "AND THE WIND WEEPS"  ("Dhe era qan") i regjisores së re shqiptare, Aulona Selmani

Sonte përfundon festivali kryesor i filmit të Zvicrës “Solothurner Filmtage”, në Solothurn. Në këtë festival jepen çmimet kryesore, më të mëdha për filmin, të ndara në 13 kategori, si: Filmi më i mirë, Regjia më e mirë, Aktori më i mirë etj., shkruan albinfo.ch Në mesin e  tyre bën pjesë edhe kategoria e “Filmit më të mirë të diplomës”, ku është nominuar edhe filmi në gjuhën shqipe “AND THE WIND WEEPS”  (“Dhe era qan”) , i regjisores së re shqiptare nga Kosova, me qëndrim në Zvicër, Aulona Selmani.

Pak fjalë për filmin dhe autoren

Filmi bën fjalë mbi pasojat e luftës në Kosovë. I mbijetuari i fundit i një masakre në luftën e Kosovës që ka ndodhur 20 vjet më parë lufton me frikën nga vdekja e mundshme e tij. Ai ka frikë se duhet të largohet pa qenë në gjendje t’u japë zë viktimave të luftës, duke përfshirë edhe djalin e tij, dhe rrjedhimisht pa mundur t`i japë zë drejtësisë…

Aulona Selmani ka bërë edhe skenarin e filmit, në të cilin luajnë Bislim Muçaj, Kumrije Hoxha, Armend Smajli etj. Pjesë e rëndësishme e filmit janë edhe Ermal Sadiku dhe Afrim Muçaj.

Regjisorja Aulona Selmani është e lindur në vitin 1997 në Binningen të Zvicrës. E rritur në Kosovë, ajo që në moshën tetë vjeçare shkruante tregime dhe poezi.

Në periudhën 2015-20 ka studiuar filmin në Universitetin e Prishtinës. Ndërkohë, ajo punon e pavarur në industrinë vendase të filmit. Në vitin 2023 përfundoi studimet për regji në ZHdK (Universiteti i Arteve i Cyrihut) me diplomë master.

Aulona ka bërë regjinë e disa filmave me metrazh të shkurtër, duke përfshirë PARIAH STATE, SI NË VAJ dhe DHE THE WIND WEEPS. SI NË VAJ ka fituar tashmë disa çmime, duke përfshirë në Festivalin e Filmit Gässli, Prifest dhe Tirana Film Fest.

Konkurrenca

Të përkujtojmë: Gjithsej 106 filma në 13 kategori kanë të drejtë për Çmimin e Filmit “Swiss 2025”. Filmat janë shikuar dhe vlerësuar nga rreth 500 anëtarë të Akademisë Zvicerane të Filmit. Rezultatet e votimit anonim shërbejnë si rekomandim për komitetin e nominimit.

Si bëhet zgjedhja e të nominuarve

Departamenti Federal i Punëve të Brendshme (ku hyn edhe sektori i kulturës) zgjedh një komision prej pesë anëtarësh nga anëtarët e Akademisë Zvicerane të Filmit, thuhet në faqen zyrtare të festivalit https://ch-cultura.ch/, transmeton albinfo.ch.

Kjo bën që nominimet të bazohen në rekomandimet e rreth 500 anëtarëve të Akademisë. Komisioni i nominimit, i kryesuar nga Annina Hasler, Shefe e Shërbimit të Kulturës së Filmit BAK, përbëhet nga anëtarët e mëposhtëm të Akademisë: Gabriella de Gara, redaktore dhe producente (Cureglia); Stéphane Kuthy, kameraman (Zürich); David Rhis, producent dhe gazetar (Carouge); Annina Wettstein, kuratore dhe konsulente e festivalit (Zürich); Hans Jürg Zinsli, gazetar (Zürich).

Java e të nominuarve

Gjatë javës së ndarjes së çmimeve nga data 17 deri më 23 mars 2025, java e të nominuarve në Cinéma Bio në Carouge dhe në Filmpodium Cyrih do t’u kushtohet filmave të nominuar. Informacione të mëtejshme do të ndiqen në www.quartz.ch

Ceremonia e ndarjes së çmimeve

Ceremonia e çmimit të filmit zviceran do të zhvillohet të premten, më 21 mars 2025, në Bâtiment des Forces Motrices në Gjenevë, transmeton albinfo.ch. Nderimi i filmave vendas realizohet nga Zyra Federale e Kulturës BAK me partnerët SRG-SSR dhe Shoqata Quartz Genève Zurich dhe organizohet në bashkëpunim me Swiss Films, Swiss Film Academy dhe Solothurn Film Days.

Të  nominuarit për Filmin më të mirë të diplomimit

DHE ERA QAN nga Aulona Selmani (Universiteti i Arteve i Cyrihut ZHdK)

MAMAN DANSE nga Mégane Brügger (École cantonale d’art de Lausanne)

VRACHT nga Max Carlo Kohal (Universiteti i Arteve i Cyrihut ZHdK)

 

 

---