Forumi i Davos, Trump sërish thirrje vendeve të NATO-s: Duhet të shpenzoni 5% të PBB-së për mbrojtjen

Keystone (AP Photo/Julia Demaree Nikhinson)

Presidenti i Shteteve të Bashkuara të Amerikës, Donald Trump në paraqitjen e tij virtuale në Forumin Ekonomik Botëror në Davos, që po mbahet në Zvicër, përsëriti dëshirën e tij që të gjitha vendet anëtare të NATO-s të shpenzojnë 5% të Prodhimit të Brendshëm Bruto për buxhetet e tyre të mbrojtjes.

“Ndërsa rivendosim sensin e përbashkët në Amerikë, ne po lëvizim shpejt për të rikthyer forcën, paqen dhe stabilitetin jashtë vendit. Unë do t’u kërkoj gjithashtu të gjitha vendeve të NATO-s që të rrisin shpenzimet e mbrojtjes në 5% të PBB-së, që është ajo që duhet të ishte vite më parë. Ishte vetëm në 2% dhe shumica e kombeve nuk paguanin derisa erdha unë. Kam insistuar që ata të paguajnë, dhe ata e bënë, sepse Shtetet e Bashkuara po paguanin vërtet diferencën në atë kohë” tha ai, transmeton albinfo.ch.

Ndërsa shumica e anëtarëve të NATO-s nuk e përmbushin objektivin e aleancës që çdo anëtar të shpenzojë një minimum prej 2% të prodhimit të brendshëm bruto për mbrojtjen, objektivi prej 2% është një “udhëzues” që nuk krijon fatura, borxhe apo detyrime ligjore nëse nuk plotësohet, e ndërsa Trump nuk është presidenti i parë që ankohet për shpenzimet e NATO-s.