Zvicër: A do të bëhet diçka më e lirë në 2025?

Zyra Federale e Shëndetit Publik (FOPH) do të ulë çmimin e qindra medikamenteve, duke përfshirë 55 për qind të ilaçeve të markës origjinale

Për fat të mirë, po.

Merrni energjinë elektrike, për shembull.

Pas rritjeve të konsiderueshme në dy vitet e fundit, tarifat e energjisë elektrike do të ulen mesatarisht me 10 për qind në vitin 2025, sipas Komisionit Federal të Energjisë Elektrike (ElCom), shkruan The Local, transmeton albinfo.ch.

Kjo do të thotë se për një familje ‘tipike’, e cila konsumon çdo vit 4500 kWh, fatura e energjisë elektrike do të jetë 141 franga më e ulët në krahasim me vitin 2024.

Ilaçet

Zyra Federale e Shëndetit Publik (FOPH) do të ulë çmimin e qindra medikamenteve, duke përfshirë 55 për qind të ilaçeve të markës origjinale.

Për më tepër, 70 për qind e barnave gjenerike dhe bio-të ngjashme do të bëhen gjithashtu më të lira.

Kjo përfaqëson një ulje të çmimit – me 12 përqind mesatarisht – për pothuajse 300 ilaçe.

Hipotekat

Të nxitura nga katër ulje të njëpasnjëshme të normave nga Banka Kombëtare Zvicerane – në mars, qershor, shtator dhe dhjetor 2024 – normat e hipotekave pritet të qëndrojnë të ulëta, të paktën në afat të shkurtër.

“Inflacioni tani po ngadalësohet më shpejt se sa pritej,” sipas Dirk Renkert, ekspert i parasë në platformën Comparis.

Deri në fund të qershorit 2025, normat treguese për hipotekat me normë fikse 10-vjeçare pritet të luhaten në intervalin nga 1.45 deri në 1.65 për qind, tha ai.

Sa i përket hipotekave pesëvjeçare me normë fikse, ato ka të ngjarë të luhaten midis 1.30 dhe 1.45 për qind – që është një lajm pozitiv për këdo që dëshiron të financojë një pronë tani ose në të ardhmen e afërt.

Çmimi i pronave nuk do të bjerë në të ardhmen e parashikueshme, por të paktën financimi i pasurive të paluajtshme do të jetë më i përballueshëm.

Qindra artikuj ushqimorë

Në tetor, Migros uli çmimet në mbi 60 lloje frutash dhe perimesh.

Çmimet për 940 produkte të tjera do të ulen gradualisht edhe gjatë muajve të ardhshëm, që do të thotë se disa ushqime do të jenë më pak të shtrenjta në vitin 2025.

Dhe sipas CEO të Migros, Mario Irminger, ky është një veprim vetëmohues nga ana e kompanisë.

“Ne po e pranojmë me vetëdije faktin se fitimi ynë do të bjerë. Si kooperativë, Migros nuk kërkon të maksimizojë fitimet e saj”, tha ai.

Irminger shtoi gjithashtu se ulja e çmimit të produkteve dhe mallrave të tjera bujqësore “nuk është në asnjë mënyrë në dëm të komunitetit bujqësor dhe prodhuesve”.

 

 

---