Raporti më i ri: Nuk pati gabime në llogaritjen e AHV-së

Raporti më i ri shfajëson BSV-në nga akuza se ka reaguar shumë ngadalë dhe ka informuar shumë vonë për problemet ekzistuese

Departamenti i Brendshëm, i cili drejtohet nga Këshilltarja Federale, Elisabeth Baume-Schneider, ka informuar në lidhje me raportin e hetimit për avarinë në lidhje me llogaritjen e AHV, që pati shpërthyer më herët këtë vit.

Në gusht doli se llogaritjet e qeverisë federale për të ardhmen financiare të AHV-së përmbanin gabime.

Siç është raportuar gjerësisht, Zyra Federale, përgjegjëse e Sigurimeve Shoqërore, BSV, i kishte llogaritur në mënyrë tepër pesimiste perspektivat financiare të sigurimit pensional, transmeton albinfo.ch. Deri në vitin 2033 kostot do të jenë katër miliardë më të ulëta se sa ishte parashikuar.

Ndërkaq, raporti më i ri shfajëson BSV-në nga akuza se ka reaguar shumë ngadalë dhe ka informuar shumë vonë për problemet ekzistuese, shkruan srf.ch.

Departamenti i Brendshëm specifikon më tej se nuk ka pasur ndonjë gabim në llogaritje që të ketë çuar në parashikimet pesimiste. Përkundrazi, ka pasur gabime metodologjike në programin e llogaritjes. Kontrolli i cilësisë nuk funksionoi në disa raste. Arsyeja për këtë ishte mungesa e stafit.

 

---