A duhet të lejohen pronarët zviceranë të bazojnë çmimet e qirasë në lagje?

Vendosja e qirave sipas çmimeve të apartamenteve të tjera në afërsi është një praktikë e zakonshme në mesin e pronarëve të Zvicrës. Tani një mocion parlamentar kërkon ta ndalojë atë.

Në mocion, deputeti Raphawl Mahaim nga Partia e Gjelbër argumenton se kjo praktikë krahasimi çon në rritje të vazhdueshme të qirave dhe duhet të ndalohet, duke pasur parasysh banesat tashmë të shtrenjta në shumë qytete.

Qeveria, megjithatë, nuk është në pajtim. Në përgjigje, Këshilli Federal rekomandon refuzimin e këtij mocioni.

“Qiratë nuk janë përgjithësisht abuzive nëse, në veçanti, ato janë brenda kufijve të qirave të zakonshme në lokalitet ose lagje”, thanë ministrat, transmeton albinfo.ch.

Më tej, përdorimi i qirave të lagjeve si udhëzues mund të jetë gjithashtu i dobishëm për qiramarrësit, vuri në dukje Këshilli Federal.

“Është e dyshimtë që ky kriter i shtyn sistematikisht qiratë lart; në rrethana të caktuara, një qira krahasuese gjithashtu mund të zbusë rritjen”.

Qeveria preferon opsione të tjera për të mbajtur nën kontroll çmimet e qirave teksa beson se “është më urgjente të merren masa në nivelin e ofertës sesa të bëhen ndryshime në mekanizmin e vendosjes së qirasë”.

Jo i vetmi faktor

Qiratë në Zvicër përcaktohen nga një sërë faktorësh të ndryshëm, dhe jo vetëm nga çmimet e lagjes.

Shumica e qirave bazohen në të ashtuquajturën normë referencë të interesit, e cila përcaktohet nga Administrata Federale e Strehimit.

Është mesatarja e gjithë interesit të paguar për hipotekat në Zvicër. Këto, nga ana tjetër, bazohen në normën bazë të interesit të Bankës Kombëtare të Zvicrës, e cila aktualisht qëndron në 1 për qind.

Për më tepër, pronari mund të vendosë (ose të rrisë) qiranë duke marrë parasysh punët për rritjen e vlerës së pronës, kostot më të larta të funksionimit për shkak të inflacionit dhe/ose rritjet e përgjithshme të shpenzimeve rrjedhëse.

Prandaj, çmimet e lagjeve janë vetëm një pjesë e procesit të përgjithshëm të përcaktimit të qirasë.

 

---