Lajme

Një deputete në Kuvendin e Shqipërisë, me doktoratë austriake

Edona Bilali është deputete e Kuvendit të Republikës së Shqipërisë, ku përfaqëson Qarkun e Shkodrës, që nga shtatori 2021. Ajo ka doktoruar në Marrëdhëniet Ekonomike Ndërkombëtare dhe Menaxhim në FH Burgenland në Austri

E enjte, 21 Nëntor 2024 - 13:15 By: Drin Reçica

Emrave të suksesshëm të shqiptarëve nga Shqipëria në Austri u bashkëngjitet edhe Edona Bilali, një profil me bagazh të konsiderueshëm profesional.

Tek Edona vërehen shumë veçanti në formimin intelektual, profesional dhe etik, në qëndrimet e saj dhe, para së gjithash, në të menduar, pasi që angazhimet dhe ambiciet e saj kanë të tjera dimensione.

Ajo ka një biografi interesante. Është lindur dhe rritur në Shkodër, për t’u bërë më pas një emër suksesi në Shqipëri e po ashtu edhe në Austri.

Edona Bilali është deputete e Kuvendit të Republikës së Shqipërisë, ku përfaqëson Qarkun e Shkodrës, që nga shtatori 2021.

Po ashtu Edona shërbeu si ministre e Shtetit për Mbrojtjen e Sipërmarrjes për periudhën shtator 2021- shtator 2023.

Më parë në emërimin e saj si ministre e Shtetit për Mbrojtjen e Sipërmarrjes, znj. Bilali ka punuar në industrinë e konsulencës së biznesit dhe prej njëmbëdhjetë vjetësh ka qenë aktive si pedagoge e ftuar në Fakultetin Ekonomik të Universitetit të Tiranës.

5 vjet rrugëtim doktoral në Austri

Mund të jetë një imazh i 2 persona dhe teksti

Edona për revistën albinfo.at ka treguar edhe për doktorimin e saj në Austri, duke e përshkruar si një periudhë shumë të veçantë në jetën e saj. Pas pesë vjetësh rrugëtim doktoral, Edona finalizoi me sukses doktoratën.

“Unë kam doktoruar në Marrëdhëniet Ekonomike Ndërkombëtare dhe Menaxhim në FH Burgenland në Austri. Jam nderuar me titullin “Summa Cum Laude”.

Kam kryer master profesional në Marketing me rezultate të shkëlqyera dhe kam ndjekur studimet universitare në fushën e Administrimit të Biznesit, nga e cila mora edhe titullin ‘Menaxhere’, shprehet ajo.

Programi i doktoratës që kreu Bilali ka në përbërje disa universitete.

Edona Bilali ishte përzgjedhur për të mbajtur fjalim në ceremoninë e diplomimit, e cila u mbajt më 14 shtator, në Vjenë.
„Në ceremoninë e diplomimit të studimeve për doktoratë më është kërkuar të mbaj fjalim motivues para personaliteteve më të larta të 6-të universiteteve evropiane që ishin pjesë e programit. Për mua ky ishte një privilegj shumë i madh, sepse kjo zakonisht iu rezervohet personaliteteve shumë të larta“, ka thënë ajo.

Në fakt, lidhjen e saj me Vjenën, përveç doktorimit të saj dhe angazhimeve profesionale me Austrinë, e përforcon edhe bashkëshorti i saj, i cili është profesor, pikërisht në Vjenë.

Jeta profesionale e Edonës

Mund të jetë një imazh i 1 person dhe duke buzëqeshur

Edona gjithashtu ka kryer një program pasuniversitar “Auditori i Brendshëm në Sektorin Publik”. “Kam përfunduar gjithashtu programin pasuniversitar “Mikroekonomia e konkurrencës”, një program i Shkollës së Biznesit në Harvard”, tregon Edona për revistën albinfo.at.

Ajo ka shumë kualifikime në fushën e Sipërmarrjes, Konkurrueshmërisë, SME-ve dhe Startups si dhe është trainere biznesi e certifikuar ndërkombëtarisht.

“Kontributet e mia në fushën e sipërmarrjes janë vlerësuar vazhdimisht nga partnerët ndërkombëtarë, pasi kam qenë e përfshirë në disa programe për mbështetjen e sipërmarrjeve të financuara nga jashtë. Në vitin 2018 u vlerësova si “Mentorja e Vitit”.

Për dy vjet akademike ka shërbyer si Mentore Biznesi në programin ‘Junior Achievement’, tregon ajo.

Po ashtu Edona është e certifikuar si Auditore Udhëheqëse në fushën e sistemeve të menaxhimit të cilësisë, sipas standardit ndërkombëtar ISO 9001.

Përveçse një grua e re dhe e suksesshme në karrierë, Edona është edhe një amvise shumë e mirë dhe zbuloi se i pëlqen shumë edhe kopshtaria, të cilën e cilëson si një ‘terapi për mendjen’, përfundoi ajo.