Iniciativë kundër çmimeve të larta të importeve

E orientuar kundër “Zvicrës, si Ishull i çmimeve të larta”, iniciativa pritet të lancohet gjatë pranverës

Zvicra, për shkak të specifikave që ka, gëzon epitetin e “ishullit” të çmimeve të larta. Produktet e importuara shpesh në Zvicër kushtojnë shumë më tepër se në vendet fqinje. Kjo ka qenë gjendja që ka shtyrë një grup personash për të zhvilluar një iniciativë popullore në nivel vendi. E orientuar kundër “Zvicrës, si Ishull i çmimeve të larta”, iniciativa pritet të lancohet gjatë pranverës, shkruan “SonntagsZeitung”.

Pjesë e grupit iniciativ janë organizatat që mbrojnë konsumatorët, pastaj Gastrosuise dhe komiteti KMU (i ndërmarrjeve të vogla dhe të mesme). Iniciativa kërkon “çmime korrekte të mallrave të importuara”. Kjo do të duhej të arrihej me veprimin e qeverisë federale, e cila duhet të ndërhyjë kur kompanitë e huaja e detyrojnë konsumatorin e varur zviceran të blejë te ato, me çmime tepër të larta.

Bartësit e iniciativës kërkojnë që ajo të cilën e synojnë përmes iniciativës të bëhet edhe pjesë e kushtetutës.