Gjermanët punuan 1.3 miliardë orë jashtë orarit në vitin 2023

KEYSTONE

Referuar statistikave, bëhet e ditur se punëtorët në Gjermani punuan rreth 1.3 miliardë orë jashtë orarit në vitin 2023.

Theksohet se këto dhëna janë të publikuara nga Instituti për Kërkime të Punësimit (IAB), përcjell albinfo.ch.

Sipas tyre, më shumë se gjysma e kësaj kohe – 775 milionë orë – mbeti pa u paguar.

Ministria e Punës e Gjermanisë tha se mesatarisht secili punëtor punoi 31.6 orë jashtë orarit në vitin 2023, prej të cilave 18.4 mbetën pa u paguar.

Komentet erdhën në përgjigje të një pyetjeje parlamentare nga Susanne Ferschl – ligjvënëse nga partia e majtë Die Linke.

“Punëdhënësit kursejnë miliarda në paga duke mos i paguar orët jashtë orarit, ndërsa punonjësit vuajnë nga zgjatja e orarit të punës dhe kërkesat e vazhdueshme për fleksibilitet”, tha Ferschl, raporton DPA.

Sipas të dhënave, totali i punës jashtë orarit vitin e kaluar korrespondon me 835.000 vende të punës me kohë të plotë.

Totali i orëve jashtë orarit në vitin 2023 ra për rreth 100 milionë orë nga viti paraprak, kur punëtorët regjistruan gjithsej 1.4 miliardë orë jashtë orarit.