Lugina e Valbonës, tërheqëse për të pasionuarit pas sporteve dimërore

Turizmi malor duket se është shndërruar në një nga tendencat më të pëlqyera të shqiptarëve

Lugina e Valbonës, pjesë e Parkut Kombëtar Alpet e Shqipërisë, sidomos nën petkun e bardhë të dëborës, vijon të tërheqë të pasionuarit pas sporteve dimërore.

Kryeministri shqiptar, Edi Rama, ndau në rrjetet sociale pamje, ku të pasionuarit pas sporteve dimërore i ushtrojnë ato në Valbonën e mbuluar nga dëbora.

“Me këtë energji të mirë që vjen nga Valbona, e preferuara e destinacioneve për sportet dimërore si freeriding, ju uroj një të diel të paqtë”, shkruan Rama, transmeton albinfo.ch.

Turizmi malor duket se është shndërruar në një nga tendencat më të pëlqyera të shqiptarëve.

Lugina e Valbonës e konsideruar një mrekulli më vete me peizazhe pyjore e ujore, male e lugina mbresëlënëse është një ndër më të frekuentuarat nga turistët vendas e të huaj.

Ajo është shpallur Park Kombëtar në janar të 1996 dhe ka një sipërfaqe prej 8000 hektarësh. E konsideruar si mrekullia e Alpeve, ndodhet 25-30 km në veri – perëndim të qytetit Bajram Curri.

---