Spanjë: Arrestohen 7 shqiptarë për vjedhje banesash

Raportohet se shtatë shqiptarë të moshave nga 26 deri në 43 vjeç janë arrestuar nga policia në Spanjë, si autorë të dyshuar për katër vjedhje banesash, përcjell albinfo.ch.

Sipas policisë spanjolle, vjedhjet janë kryer javën e kaluar në qytetet Palomares del Campo, Huete dhe Tinajas.

Grupi kriminal i shqiptarëve ra në sytë e hetuesve në saje të identifikimit që iu bë targës së falsifikuar së njërit prej automjeteve.

Shtatë shqiptarëve u janë gjetur 7500 euro, bizhuteri, detektor frekuencash, 200 gramë marihuanë, si dhe u sekuestrua automjeti përdorur në grabitjen e fundit në Palomares del Campo. Nga ana logjistike, ata përdornin automjete me fuqi të lartë, të cilat i ndihmonin të largoheshin me shpejtësi nga vendngjarja.

Grupi i shqiptarëve ndodhet në paraburgim nën akuzat për katër vjedhje me dhunë dhe falsifikim të dokumenteve.

Hetimet vazhdojnë, duke mos përjashtuar arrestimet e reja dhe përfshirjen e mundshme të këtij grupi kriminal në vepra të tjera penale.