Shqipëria miraton marrëveshen 3-vjeçare me Zvicrën për kujdesin shëndetësor

Shqipëria ka miratuar sot marrëveshjen e bashkëpunimit trevjeçar me Zvicrën, e cila pritet të ketë një ndikim të jashtëzakonshëm në përmirësimin e shërbimit shëndetësor parësor.

Lajmin e ka bërë të ditur ministrja e Shëndetësisë dhe Mbrojtjes Sociale, Albana Koçiu, pas mbledhjes së Këshillit të Ministrave.

“Përmes projektit HAB “Shëndetësi për të gjithë“, që do të përfundojë në vitin 2027, qeveria shqiptare dhe MSHMS do të kenë mundësi të përfitojnë nga protokolle pune dhe standarde të miratuara tashmë dhe që shërbejnë për të ngritur në një nivel më të lartë bashkëpunimin dhe shërbimin shëndetësor në të gjitha qendrat shëndetësore në vend”, tha Koçiu.

Ajo shtoi se marrëveshja ndihmon të shtrihen shërbimet shëndetësore në të gjitha qendrat shëndetësore në mbarë vendin.

“E rëndësishme gjithashtu është të theksoj se shërbimi shëndetësor do të jetë ofruar në mënyrë të posaçme edhe për gratë, fëmijët të moshuarit apo të sëmurët kronikë, duke bërë të mundur zbatimin e një vizioni të konsoliduar të qeverisë shqiptare për të përmirësuar shërbimit që ofrohen pranë banesës për të rritur mbulimin universal shëndetësor dhe ndërkohë, nga ana tjetër, të mund të ofrojmë shërbime shëndetësore në portën e parë hyrëse për këdo qytetar që kanë nevojë për një shërbim të tillë“, deklaroi Koçiu.