Ngjarjet që tronditën Kosovën, deklarohet ministri i brendshëm

Për vetëm një javë Kosova u trondit nga disa ngjarje të rënda. Fillimisht një grabitje e armatosur një javë më parë në një argjendari në Suharekë, pastaj edhe dy vrasjet e mbrëmshme në Prishtinë.

Për plaçkitjen e armatosur në Suharekë e cila sot rezultoi edhe me një të dyshuar të vrarë nga Policia e Kosovës në tentimin për t’iu shmangur arrestimit, ka reaguar minisitri i brendshëm i Kosovës Xhelal Sveçla, shkruan albinfo.ch.

Ai përmes rrjeteve sociale ka shkruar se akte të tilla janë absolutisht të papranueshme dhe përgjigjja e vetme ndaj kriminelëve të tillë është sjellja para drejtësisë.

“Për këtë, Policisë së Kosovës i kam ofruar mbështetjen time të plotë institucionale si dhe kam kërkuar angazhim maksimal në zbardhjen e këtij rasti. Sot jam njoftuar që Policia e Kosovës pas një pune intenzive hetimore ka lokalizuar plaçkitësit dhe ka realizuar operacionin e arrestimit të tyre. Njëri nga të dyshuarit ka shtënë drejt zyrtarëve duke plagosur një zyrtar policor dhe me këtë rast i njejti është neutralizuar. Deri më tash janë arrestuar shtatë persona ndërsa Policia është në kërkim të personit tjetër të përfshirë në këtë rast. Dy zyrtarëve policor të cilët janë plagosur dhe zyrtarit të lënduar në reagim dhe arrestim të të dyshuarve të këtij rasti ju uroj shërim të shpejtë”, shkruan Sveçla.

Ai poashtu theksoi se krimet nuk do të mbesin pa u ndëshkuar.

“Vendi i kriminelëve është burgu, dhe ky është mesazh i qartë dhe i prerë që duhet të marrë kushdo që tenton që për çfarëdo arsye të destabilizojë sigurinë në vendin tonë. Rendi dhe ligji do të mbizotërojnë në çdo cep të saj”, shkroi Sveçla.