Këshilli i Arsimtarëve në Diasporë, me mesazh për Festën e Flamurit

Këshilli Koordinues i Arsimtarëve në Diasporë (KKAD-ja) përmes një mesazhi u ka uruar shqiptarëve, kudo që janë, 28 Nëntorin, Ditën e Flamurit, ditën më të shenjtë në historinë e kombit shqiptar, kjo datë që realizoi ëndrrat, idealet dhe përpjekjet e të gjithë brezave shqiptarë.

“Muaj nëntor është muaj i shumëfishtë që na bën të ndihemi krenarë pas Lidhjes së Prizrenit, me Kongresin e Alfabetit (14-22 nëntor 1908), Pavarësinë e Shqipërisë (28.11.1912), daljen në skenë të UÇK-së (28 nëntor 1997) dhe për ditëlindjen e kryeheroit Adem Jasharit. Këshilli Koordinues i Arsimtarëve në Diasporë, me përgjegjësi morale e kombëtare i përkushtohet vlerës së kombit, gjuhës shqipe dhe për këtë thërret institucionet e dy shteteve shqiptare, të Republikës së Shqipërisë dhe të Kosovës, bashkëkombësit, shoqatat dhe bizneset, të gjithë të bashkuar ta kenë në vëmendje mërgatën shqiptare”, thuhet në mesazh.

Tutje theksohet se bashkimi u bën të mundur shqiptarëve ta ruajnë dhe ta kultivojmë gjuhën e origjinës te çdo mërgimtar, që të mos ndihet i vetmuar, por të ketë ndjesinë se i ka pasur institucionet e atdheut, të cilat i dalin në përkrahje, aty ku i duhet ndihma e shtetit-atdheut.