Qeveria gjermane rifut në axhendën parlamentare reformën e shtetësisë së dyfishtë

@pixabay

Pas heqjes së reformave të shtetësisë nga rendi i ditës mes debateve antisemitiste, qeveria gjermane ka ricaktuar leximin e parë të ligjit historik të dyshtetësisë për 1 dhjetor të këtij viti.

Leximi i parë i projekt-ligjit fillimisht ishte planifikuar për datë 9 nëntor, por u hoq në heshtje nga plani parlamentar pasi Demokratët e Lirë (FDP) ngritën pyetje rreth antisemitizmit në vazhdën e luftës Izrael-Hamas.

“Pikëpyetja që ata kanë tani është nëse akti i ri i shtetësisë është mjaft i mirë për të parandaluar këdo që është antisemitik të marrë nënshtetësinë gjermane”, ka thënë për thelocal.de deputeti i SPD, Hakan Demir, një nga politikanët që punon në legjislacion, përcjell albinfo.ch.

Një ide në tavolinë thuhet se përfshinte një njohje të qartë të së drejtës së Izraelit për të ekzistuar si pjesë e procesit të natyralizimit – një propozim i paraqitur gjithashtu nga partia opozitare CDU dhe kjo do të shkonte një hap më tej se propozimi aktual, i cili i pengon njerëzit që kryejnë “akte ksenofobike, raciste ose antisemitike” të mos bëhen ndonjëherë gjermanë.

Është e paqartë nëse ky ndryshim është shtuar në ligj.

Me ose pa amendamente, reforma gjithëpërfshirëse e ligjeve të shtetësisë në Gjermani do të shkojë tani në Bundestag të premten, më 1 dhjetor për leximet e para nga tre. Në lexim të tretë, projektligji do të shkojë në votim, të cilin pritet ta kalojë.

Parlamentarët thonë se nuk ka nevojë që legjislacioni të kalojë nëpër dhomën e sipërme, ose Bundesrat, pasi përmbajtja e tij nuk ndikon në funksionimin ose financimin e përditshëm të shteteve federale.

Qeveria synon ta miratojë legjislacionin deri në prill të vitit të ardhshëm.

Sapo ligji të hyjë në fuqi, ai do t’i japë fund një ndalimi ekzistues për mbajtjen e shtetësive të shumëfishta, që do të thotë se qytetarët e BE-së dhe jo-BE do të jenë në gjendje të natyralizohen si gjermanë pa hequr dorë nga shtetësia e tyre aktuale.

Ai do të shohë gjithashtu që kërkesat standarde të qëndrimit për shtetësi të reduktohen nga tetë në pesë vjet, apo edhe në tre në rrethana të jashtëzakonshme.

Fëmijët e të huajve do të fitojnë automatikisht shtetësinë gjermane pasi prindërit e tyre të kenë qenë në vend për pesë vjet dhe personat mbi moshën 67 vjeç nuk do të duhet të kalojnë më një test zyrtar të gjuhës B1.