Ambasadori francez për liberalizimin: Rrezik nëse nuk dëgjohet mesazhi i presidentit Macron

(AP Photo/Michel Euler, Pool)

Ambasadori i Francës në Kosovë, Olivier Guérot, ka folur për deklaratën e presidentit të Francës, Emmanuel Macron, në lidhje me liberalizimin e vizave për Kosovën.

Në një intervistë për KOHËN, i pyetur nëse kosovarët mund të lëvizin lirshëm për në Francë nga data 1 janar, ambasadori Guerot ka thënë se presidenti i Francës i ka bërë të qarta pritshmëritë e tij, përcjell albinfo.ch.

“Gjatë konferencës për shtyp me kryeministrin shqiptar, Edi Rama, presidenti francez theksoi nevojën që të dyja palët të tregojnë përgjegjësi. Ai nënvizoi qartë pritshmëritë e tij nga presidenti serb, Vuçiq: të dënojë me vendosmërinë më të madhe aktet e 24 shtatorit dhe të ndihmojë në rivendosjen e qetësisë në kufi. Shpresojmë që të ndriçohet e tëra rreth sulmit të 24 shtatorit dhe autorët e tij të dalin para drejtësisë. Ai kërkoi nga të dyja palët që të angazhohen për riorganizimin e zgjedhjeve në veri të Kosovës, me pjesëmarrjen e serbëve dhe kthimin e tyre në institucionet kosovare. Ai ka apeluar në frymën e përgjegjësisë së presidentit serb Vuçiq dhe ka shprehur të njëjtat pritshmëri nga presidenti dhe nga kryeministri i Kosovës. Pikërisht në këtë kontekst ai ngriti edhe çështjen e liberalizimit të vizave, i cili ishte një gjest besimi, por që në këtë fazë nuk ishte reciprok. Prandaj ai priste që autoritetet kosovare, sikurse edhe autoritetet serbe, të respektojnë fjalën e dhënë dhe të angazhohen për të ecur përpara në javët e ardhshme”, ka thënë ai.

Ndërkaq në pyetjen se a mund t’i sigurojë kosovarët që pas 1 janarit mund ta vizitojnë Francën dhe vendet e tjera të zonës Schengen, pa pasur nevojë për vizë, ai u shpreh se në këtë fazë përgatitjet teknike për liberalizimin e vizave më 1 janar po vazhdojnë, por do të ishte me rrezik të mos dëgjohet mesazhi politik i presidentit Macron.