Rekord i donacioneve në Zvicër, gjatë 2022-ës arritën në 2.5 miliardë franga

(KEYSTONE/Gaetan Bally)

Organizata Zewo ka njoftuar se donacionet arritën në 2.5 miliardë franga në Zvicër në vitin 2022.

Ky rekord mund të shpjegohet veçanërisht nga pagesat në favor të Ukrainës.

Për herë të tretë radhazi, më shumë se 2 miliardë franga u dhuruan në Zvicër, sipas raportit të publikuar të hënën nga Swissfundraising dhe fondacioni Zewo. Në vitin 2021 ishin mbledhur 2.05 miliardë franga, shkruan RTS.

Donacionet për Ukrainën kontribuuan ndjeshëm në rezultatin rekord të vitit, duke arritur në rreth 418 milionë. Donacionet për ndihmë ndërkombëtare jashtë vendit u rritën me 30%, ndërsa ato sociale dhe shëndetësore në Zvicër ngecën, zbulon më tej raporti.

Donacionet digjitale, veçanërisht nëpërmjet aplikacionit të pagesave Twint, janë shumë të njohura. Që nga viti 2019, shumat e paguara me këto mënyra pagese janë rritur nga 22 milionë franga në 117 milionë. Kështu, vëllimi i transaksioneve është shumëzuar me pesë në katër vjet.

Donacionet nga familjet private kanë tejkaluar tendencën e rritjes lineare afatgjatë edhe më qartë se sa për donacionet për Covid në dy vitet e mëparshme.

Në total, 7 franga nga 10 donatorë në Zvicrën gjermanishtfolëse vinin nga familje private, krahasuar me 6 franga nga 10 në Zvicrën frëngjishtfolëse, përcjell albinfo.ch.

Nga 2.5 miliardë franga në donacione të marra nga organizatat e ndihmës reciproke në vitin 2022, 1.51 miliardë iu paguan organizatave që mbajnë etiketën e cilësisë Zewo. Tridhjetë e pesë nga 50 organizatat më të mëdha që mblodhën donacione në vitin 2022 mbajnë këtë etiketë.

Fondacioni Zewo është shërbimi zviceran i certifikimit për organizatat bamirëse që mbledhin donacione. Swissfundraising është një organizatë profesionale e grumbulluesve të fondeve në Zvicër, shkruan RTS.