Shaqiri para ndeshjes kundër Kosovës: Kam marrë shumë mesazhe që të mos shënoj gol

Xherdan Shaqiri do të luajë në ndeshjen kualifikuese të Kampionatit Evropian kundër Kosovës dhe në prag të kësaj, është shprehur se do të jetë një lojë shumë e veçantë për të.

“Unë kam lindur në këtë vend dhe kam shumë anëtarë të familjes atje. Të dy prindërit e mi kanë nëntë vëllezër e motra. Mund ta imagjinoni sa kushërinj kam. Më duhej të organizoja mbi 50 bileta”, ka thënë ai për 20min.ch, shkruan albinfo.ch.

I pyetur nëse do të festonte në rast se shënon, ai tha se ka marrë shumë mesazhe që i thonë të mos shënojë gol, ndërsa u shpreh se është sportist dhe do të japë gjithçka për Zvicrën.

“Por, nuk do të festoj nëse shënoj gol për respekt për Kosovën – këtë duhet ta bëjnë bashkëlojtarët e mi”, tha ai.

Ndërkaq kur u pyet se si i vlerëson paraqitjet kualifikuese të Kosovës deri më tani, pasi nuk pati asnjë fitore në katër ndeshjet e para, ai tha se u befasua shumë nga rezultati.

“Nuk i prisja rezultatet veçanërisht në ndeshjet në shtëpi. Nëse shikoni cilësinë e ekipit, kjo nuk ishte e mjaftueshme. Ata mund dhe duhet të kenë ambicie më të mëdha me këta lojtarë. Por kam besim se do të paraqiten ndryshe me një trajner të ri”, ka thënë ai.