Sindikatat kërkojnë paga më të larta për punëtorët

Travail.Suisse, ombrella e sindikatave të punëtorëve, po kërkon rritje të pagave nga 3.5 deri në 4.5%, varësisht prej sektorit, kërkesën e bazon në rënien e fuqisë blerëse.

“Për herë të tretë radhazi, pagat reale po bien në Zvicër. Kompanitë kanë hapësirë të mjaftueshme për rritje. Fitimet e tyre janë “të tepërta”, madje tejkalojnë shifrat para pandemisë”, thuhet në deklaratën e tyre.

Rritje të konsiderueshme të pagave janë veçanërisht të kërkuara për profesionet e zejtarisë, makineritë, pajisjet elektrike dhe industrinë e metalurgjisë dhe sektorin e shëndetësisë, shton Johann Tscherrig, kreu i interesit dhe politikave kontraktuale në sindikatat Syna, shkruan RTS.

Këshilltarja Kombëtare, Greta Gysin, presidente e sindikatës së stafit transfair, thotë se stafi i shërbimit publik ka nevojë për kompensim.

Sipas Zyrës Federale të Statistikave (FSO), gjatë dhjetë vjetëve të fundit zviceranët kanë krijuar 10% më shumë vlerë të shtuar reale, pa u përafruar me këtë rritje pagat reale, përcjell albinfo.ch.

Krahas rënies së pagave reale, Thomas Bauer përmend edhe presionin shtesë që shkaktojnë premitë e sigurimeve shëndetësore.

Këto kanë përjetuar një rritje prej 23% të sigurimit bazë gjatë tetë vjetëve të fundit.

Rritja e qirave është gjithashtu në pikëpyetje, veçanërisht për punëtorët e rinj që lëvizin në banesa të reja.

Këto të fundit janë rritur me 3.3% gjatë 12 muajve të fundit. Në total, sipas përllogaritjeve të Travail.Suisse, kostoja shtesë e jetesës për këtë vit dhe vitin e ardhshëm duhet të jetë rreth 3%, shkruan RTS.