Përvojat e praktikantëve dhe kërkesa për rritjen e pagës minimale në Zvicër

Ilustrim, Pixabay

Oraret, kontratat dhe pagat e praktikantëve varen nga degët e ndryshme profesionale dhe kantonet. Për t’i dhënë fund pabarazive, Rinia Socialiste kërkon një minimum prej 1000 frangash në muaj nga viti i parë i praktikës, shkruan RTS.

Një praktikant restoranti prej dy muajsh, Louis Walliman tashmë po bën punën si një kuzhinier. Në moshën 19-vjeçare, ai la praktikën e zdrukthtarisë për atë të një specialisti restaurimi. Ky ndryshim orientimi i shkon më shumë dhe e paguan më shumë.

“Të paguhesh do të thotë të fillosh pavarësinë tënde, në një mënyrë të caktuar. Është gjithashtu një lloj shpërblimi. Të punosh është mirë. Por të punosh për asgjë është pak e dhimbshme,” tha ai, përcjell albinfo.ch.

Një mendim i ndarë nga shefi i tij Stefano Fanari, i cili prej dhjetë vitesh trajnon praktikantë. Sipas tij, paga është mjet për motivimin e të rinjve dhe sigurimin e vazhdimësisë.

“Në gastronomi, praktikantët paguhen 1200 franga vitin e parë, 1500 franga vitin e dytë dhe 1700 franga vitin e tretë”, tregon ai që është edhe kryetar i komisionit të formimit profesional të Shoqatës së kafeterive, restauratorëve dhe hotelierëve nga Gjeneva, shkruan RTS.

“Profesionet e tjera duhen vënë në të njëjtën linjë me gastronominë apo muraturën, ku praktikantët paguhen shumë mirë në krahasim me të tjerët që kanë 400 apo 600 franga në muaj”, vlerëson Stefano Fanari.

Në Gjenevë, praktikantët më të paguar janë kopshtarët me 1375 franga në muaj. Më pak të paguar janë arreduesit me 300 franga në muaj. Për parukeri është 450 franga në muaj, përcjell albinfo.ch.

E përballur me këtë pabarazi mes degëve, Rinia Socialiste kërkon një pagë minimale prej 1000 frangash. Por jo të gjithë janë dakord me këtë ide.

“Shefët nuk mund të paguajnë 1000 franga për një nxënës të vitit të parë. Sepse nuk ka kthim. Duhet t’u mësosh gjithçka. Në vitin e parë nuk bëjnë shumë. Thjesht mësojnë”, thotë Claudine Schmid, presidente e seksionit të Gjenevës të Coiffure Suisse.

Sindikata e Punëdhënësve Zvicerane kundërshton gjithashtu pagat minimale ligjore. Sipas organizatës, ato do të rrezikonin sistemin e formimit profesional në Zvicër, shkruan RTS.