Nis iniciativa që kërkon pagë mujore 1000 franga për praktikantët

Presidenti i të Juso, Nicola Siegrist, është shprehur se praktikantët po shfrytëzohen në industri të caktuara, me javë pune 42-orëshe, punë jashtë orarit të papaguar, shumë përgjegjësi dhe stazhe që duhet t’i paguajnë vetë.

“Veçanërisht parukierët dhe praktikantët në industrinë e kozmetikës, por ndonjëherë edhe në profesionet mjekësore shpesh marrin vetëm 400 ose 500 franga në vitin e parë të trajnimit”, ka thënë ai, përcjell albinfo.ch.

Sipas tij, kjo nuk mjafton dhe ka shumë probleme të tjera, kësisoj ai kërkon pagë minimale ndër-industriale për 1000 franga për vitin e parë të praktikës.

“Si rezultat, nxënësit varen nga mbështetja financiare nga prindërit e tyre, gjë që nuk është e mundur për të gjithë. Pra, disa njerëz nuk mund të përballojnë as të kryejnë një praktikë. Ata shpesh nuk i nënshtrohen kontratës kolektive të punës dhe nuk ka një pagë minimale ligjore”, thotë ai, shkruan 20minuten.

Juso nisi të martën një lloj plani online: nxënësit duhet të emërtojnë në mënyrë anonime kompanitë e trajnimit që paguajnë paga shumë të ulëta.

Siegrist i bën thirrje qeverisë federale në Bernë dhe dëshiron të kërkojë mbështetje për një përparim në javët e ardhshme.

“Ne e kemi të qartë që kompanitë e trajnimit ofrojnë shërbim edhe me trajnimin e të rinjve. Ne nuk duam që ata të futen në telashe sepse nuk mund të përballojnë paga më të larta të studentëve. Qeveria federale duhet të gjejë një zgjidhje këtu”, u shpreh ai.

Këshilltarja Kombëtare e PS-së, Sarah Wyss, e mbështetë këtë ide.

“Çdo përmirësim i kushteve të punës së praktikantëve është për t’u mirëpritur. Përveç pagës, kjo mund të përfshijë edhe të paktën gjashtë javë pushim, siç e kam kërkuar paraprakisht”, thotë ajo, përcjell albinfo.ch.

Wyss e arsyeton mbështetjen e saj me faktin që në disa sektorë ka mungesë të praktikantëve.

“Kushtet për nxënësit duhet të përmirësohen. Nisma Juso më duket relativisht e moderuar, por përmbajtja është për këtë arsye edhe më e denjë për mbështetje”, vazhdon tutje ajo.

Mbështetje ka edhe nga sindikatat: Urban Hodel, Bashkë-Shef i Komunikimeve në Konfederatën Zvicerane të Sindikatave.

“Praktikantët nuk duhet të shfrytëzohen. Ka raste kur paga është në kontrast të plotë me produktivitetin real të nxënësve. Kur bëhet fjalë për praktikat, megjithatë, fokusi është në cilësinë e trajnimit, jo kryesisht në pagë”, tha ai, shkruan 20minuten.

 

---