Shqipëri: Protestojnë studentët e mjekësisë, kundërshtojnë vendimin që ua ndalon të ikin nga vendi

Një vendim i Qeverisë së Shqipërisë që ndalon studentët e mjekësisë të lëshojnë vendin 5 vjet pas përfundimit të studimeve, ka nxjerrë në protestë studentët.

Ata protestuan të enjten para Parlamentit të Shqipërisë, duke kundërshtuar këtë vendim, transmeton albinfo.ch.

“Masa më drastike që ne mendojmë të marrim është bojkotimi i vitit të ardhshëm akademik. Me këtë protestë po tregojmë qëndrimin tonë ndaj një propozimi që del papritur si projektligj. Është absurde të detyrosh mjekët të rrinë kur nuk ke pagat për të mbajtur këta mjekë. Unë jam nga ato që dua të rri në Shqipëri, por na detyrojnë të ikim me mënyrat e tyre”, tha një nga përfaqësueset e protestës studentore.

Një ditë më parë kryeministri Edi Rama theksoi se “çdo student që do të hyjë në Universitetin e Mjekësisë do të njihet me faktin që për t’u pajisur me diplomë do të duhen 5 vjet në shërbim të këtij populli”.

Sipas tij, ky vendim është i domosdoshëm në kushtet kur vende të pasura janë bërë ndalesa e fundit për shumë profesionistë të kualifikuar.