Shkolla në Cyrih anulon aktivitetet pas kërcënimeve

Një shkollë e mesme në Stäfa, kantoni i Cyrihut, ka anuluar “Ditën e saj të gjinisë” pas kërcënimeve që kanë marrë drejtuesit e shkollës, shkruan swissinfo.ch.

Të enjten shkolla lëshoi një deklaratë, duke njoftuar anulimin e ngjarjes, pasi anëtarët e stafit kishin marrë kërcënime.

Kritika nuk munguan edhe në rrjetet sociale, duke përfshirë edhe politikanë të shquar. Njëri prej tyre, Andreas Glarner, nga Partia Popullore Zvicerane e krahut të djathtë, duke kërkuar shkarkimin e udhëheqësve të shkollës. Një tjetër parlamentar nga Partia Popullore, Roger Köppel, tha në transmetimin e tij të videos në Weltwoche Daily se ngjarja ishte një “seksualizim i mësimeve në shkollë”.

Bordi drejtues gjithashtu pati frikë nga ndërprerjet atë ditë. “Ne e anuluam ditën kryesisht për shkak të situatës së sigurisë”, tha Patrick Rüedi, Drejtor i Arsimit në komunë. Ai tha për Tages-Anzeiger se ishte “i tronditur” nga përgjigjja, veçanërisht pasi pa fletushka që ftonin njerëzit të paraqiteshin në shkollë të hënën, përcjell albinfo.ch.

Politikani i Partisë Radikale-Liberale të qendrës së djathtë, Christian Haltner, i cili është president i Komunës Stäfa, denoncoi sulmet, duke thënë veçanërisht se “deputetët kombëtarë nuk duhet të ndërhyjnë në autonominë komunale”.

Temat e ‘Ditës Gjinore’ janë përfshirë edhe në kurrikulën “Lehrplan21”, plani i studimit për Zvicrën gjermanishtfolëse. Sipas autoriteteve lokale, qëllimi ishte të “inkurajohen të rinjtë të reflektojnë mbi standardet dhe vlerat e tyre dhe të diskutojnë hapur identitetin gjinor dhe seksualitetin”.