Austri: Ekspozitë me 40 punime nga skulptori Destan Gashi dhe piktorja Barbara Gashi

Mësohet se skulptori shqiptar, Destan Gashi dhe bashkëshortja e tij, piktorja Barbara Gashi hapën në muzeun e Langenzersdorfit, Austri, një ekspozitë me 40 punimet e tyre, që do të qëndrojë e hapur deri më 18 qershor 2023, të shtuna dhe të djela, si dhe në ditët e festave zyrtare nga ora 14:00 – 18:00, përcjell albinfo.at.

Në ceremoninë zyrtare të hapjes së ekspozitës më 3 maj 2023, krahas shumë zyrtarëve lokalë, artistëve dhe bashkatdhetarëve, merrnin pjesë Ambasadori i Republikës së Shqipërisë në Austri z.Roland Bimo, Ambasadori i Republikës së Kosovës në Austri z.Lulzim Pllana, deputeti i Parlamentit austriak z. Andreas Minnich (ÖVP), z.Gregor-Anatol Bockstefl, Drejtor i Muzeut, Dr. Leopold Kogler, President i Shoqatës së Artistëve të Austrisë së Poshtme, dhe znj.Ingeborg Treitl, përgjegjëse për kulturën, të cilët përshëndetën të pranishmit dhe vlerësuan cilësinë dhe tematikën e veprave të dy artistëve të talentuar, si dhe bashkëpunimin ne fushën e artit dhe të kulturës si një urë e rëndësishme e lidhjes midis të dy popujve.

Takimi vijoi me një bashkëbisedim me artistët dhe zyrtarët lokalë për mundësitë e shtimit të veprimtarive të këtij lloji dhe mbështetjes së artistëve shqiptarë në Austri.