Britania dërgon zyrtarë në Shqipëri për të bindur të rinjtë të mos shkojnë si emigrantë

Punonjës bamirësie nga Britania vijnë në Shqipëri për të bindur të rinjtë të mos ikin nga vendi

Media britanike “The Mirror” ka publikuar së fundmi një artikull, ku ndër të tjera shkruan se punonjës britanikë të institucioneve të bamirësisë do të zbarkojnë në Shqipëri këtë javë.

Vizita e tyre ka në fokus emigrimin e qytetarëve shqiptarë, në përpjekje për të mësuar përse ka kaq shumë të rinj nga Shqipëria që emigrojnë drejt Anglisë duke rrezikuar jetën me gomone.

Siç shkruan media britanike, studiuesit nga Fondacioni “Sanctuary”, të udhëhequr nga Dr. Krish Kandiah, janë vendosur për një “mision”, duke kërkuar të gjejnë mënyra për të bindur të rinjtë që të mos bëjnë udhëtimin e rrezikshëm.

Ata do tentojnë që të gjejnë mënyra për të ndihmuar zonat e varfra të vendit, në mënyrë që të rinjtë të shohin një të ardhme në Shqipëri.

Rreth 12,301 njerëz nga Shqipëria erdhën në Mbretërinë e Bashkuar me gomone përgjatë kanalit vitin e kaluar. Dhe, nga mijëra të rinjtë që kanë hyrë në sistemin e referimit të qeverisë, 90% thonë se janë viktima të skllavërisë moderne.

---