Cila pjesë e Zvicrës do të prekej më shumë nga tërmeti?

(EDA/Michael Fichter)

Një prej rreziqeve më të mëdha natyrore që e kanosin Zvicrën janë pa dyshim edhe tërmetet. Autoritetet zvicerane kanë hartuar një model që mat rrezikun nga tërmeti, i cili tregon se cila pjesë e shtetit të Zvicrës mund të dëmtohet më shumë nga një tërmet i fuqishëm, shkruan 20minuten, përcjell albinfo.ch.

Sizmo.ethz.ch është modeli që rrezikun më të madh e parasheh pikërisht në qytetet më të mëdha të Zvicrës. Në Basel, Gjenevë, Cyrih e Lucern do të dëmtoheshin më së shumti njerëz.

Dëmet në ndërtesa pritet, sipas modelit të jenë në kantonet e Bernit, Valais, Cyrihut, Vaud dhe Basel – Stadt, ku përllogaritet të jetë edhe gjysma e dëmit financiar.

Sipas këtij modeli, rreth 40,000 deri në 175,000 njerëz mund të mbesin pa strehë e rreth 150 deri në 1600 njerëz mund të humbin jetën. Llogaritet që dëmet nga shkatërrimi i ndërtesave mund të shkojë nga 11 deri në 44 miliardë franga, shkruan 20minuten, përcjell albinfo.ch.

Modeli ka bërë edhe krahasime mes tërmeteve në të kaluarën dhe situatën e tanishme, ku një përsëritje e tërmetit të vitit 1356 në Basel me 6.6 shkallë do të mund të vriste 3000 njerëz e të shkaktonte dëme deri në 45 miliardë franga.