Nestlé në mesin e 20 firmave ushqimore të akuzuara për ‘përfitim nga uria’

Kompanitë ushqimore shumëkombëshe, duke përfshirë Nestlé, kanë përdorur luftën në Ukrainë dhe pandeminë Covid si pretekst për çmime më të larta të ushqimeve, pretendon një raport i Greenpeace. Kompania zvicerane e mohon akuzën, përcjell albinfo.ch

“Midis 2020 dhe 2021, të ardhurat neto të Nestlé u rritën nga 12,2 miliardë CHF në 17,4 miliardë CHF, ndërkohë që ne po vuanim fuqinë e plotë të krizës Covid,” tha Davi Martins, aktivisti i Greenpeace International, të mërkurën për mediat lokale.

“Moralisht, kjo ngre pikëpyetje,” shtoi ai.

Nestlé është e vetmja kompani zvicerane midis 20 kompanive ushqimore të studiuara në raportin e porositur nga Greenpeace dhe të publikuar të martën.

Sipas Greenpeace, rritja e çmimeve të ushqimeve u shoqërua me një rritje të të ardhurave të shumëkombësheve dhe dividentëve që u paguanin aksionerëve të tyre.

Duke iu përgjigjur akuzave, Nestlé pohoi se “si shumë të tjerë”, ajo ka pësuar “peshën e inflacionit ekstrem të kostos” gjatë dy viteve të fundit. Ajo gjithashtu deklaroi se është e detyruar të respektojë detyrimet e saj ndaj aksionarëve të saj, përcjell tutje albinfo.ch