Lajme

Alain Berset, president i Zvicrës nga 1 janari deri më 31 dhjetor 2023

Zgjidhet presidenti i ri i Zvicrës

E enjte, 8 Dhjetor 2022 - 14:00 albinfo.ch

Ndërsa zgjodhën dy anëtarët e rinj të kabinetit të mërkurën, deputetët zgjodhën gjithashtu presidentin e ri për vitin 2023 nga shtatë këshilltarët federalë, siç bëhet çdo vit më 7 dhjetor, përcjell albinfo.ch.

Alain Berset, ministri aktual i Shëndetësisë dhe kreu i Departamentit Federal të Punëve të Brendshme, do të shërbejë si president i Zvicrës nga 1 janari deri më 31 dhjetor 2023, duke zëvendësuar presidentin aktual, Ignazio Cassis.

Ndryshe nga vendet e tjera, presidentët zviceranë nuk janë kryetarë qeverish dhe nuk kanë pushtet të veçantë. Roli i tyre është të kryesojnë mbledhjet e Këshillit Federal, të ndërmjetësojnë në rast mosmarrëveshjesh dhe të përfaqësojnë Zvicrën jashtë vendit.