‘Shtëpia e barit’, 20-vjeçari shqiptar arrestohet në Angli

(AP Photo/Frank Augstein)

Një gabim me grilat e dritareve ka zbuluar 20-vjeçarin shqiptar që kujdesej për ‘shtëpinë e barit’, përcjell albinfo.ch.

Policia britanike e ka zbuluar rastin pas sinjalizimit që patën nga një koleg i tyre, i cili kishte vënë re se grilat e dritareve të mbyllura të pronës në fjalë “lëviznin në mënyrë konstante”.

Menjëherë oficerët dyshuan se grilat po lëvizin për shkak të ventilimit të fuqishëm brenda shtëpisë dhe dyshuan se aty prodhohej kanabis.

Për këtë arsye ata shkuan për kontroll në pronën në fjalë që ndodhej në Ashton Avenue, në Harehills.

Ata u detyruan që ta hapnin derën me forcë për shkak se ishte e përforcuar dhe kur arritën të futeshin brenda, gjetën plot 5 dhoma të mbushura me bimë kanabisi, vlera e së cilave shkonte në 92 mijë paundë. E teksa e rrethuan zonën, në shtëpi mbërriti shqiptari R. Tafa, i cili u vu në pranga.

Shenjat e tij të gishtave u gjetën në ventilatorët që përdoreshin për të rritur bimët. 20-vjeçari, i cili nuk kishte precedentë të mëparshëm penale, pranoi se kujdesej për kultivimin e drogës.

Avokati i tij mbrojtës tha se i riu ishte larguar nga Shqipëria rreth 1 vit më parë, kishte jetuar në Francë për një farë kohe, e më pas kishte mbërritur në mënyrë të jashtëligjshme me anije në Britani. Gjykata e dënoi 20-vjeçarin më 26 muaj burgim.