‘Shqiptarët punojnë në fermat e kanabisit, 3 ditë pas arritjes në Angli’  

Më shumë se 32,000 emigrantë kanë kaluar Kanalin Anglez me varka të vogla deri më tani këtë vit, shkruan Dailymail

Emigrantët shqiptarë po punojnë në fermat e kanabisit tri ditë pasi kalojnë Kanalin. Ata po rekrutohen në mënyrë aktive nga bosët e drogës për të kultivuar kanabis në shtëpi boshe dhe ndërtesa industriale që janë shndërruar në vende prodhimi pas lirimit të tyre nga paraburgimi.

Emigrantët, shumica e të cilëve janë të rinj në të 20-at, kryejnë punën për të ndihmuar në pagimin e borxheve prej 5,000 £ që u detyrohen kontrabandistëve kurdë pas udhëtimeve me gomone.

Ministria e Drejtësisë zbuloi dje se vetëm vitin e fundit janë shpenzuar një rekord prej 1.2 milionë paund për t’u siguruar përkthyesve shqiptarë komunikim në lidhje me procedurat ligjore. Kjo rritje vjen pasi numri i shqiptarëve të mbyllur në burgjet në Angli dhe Uells është rritur gjithashtu nga 726 në 1500.

Duke folur për televizionin shqiptar, një emigrant tha se ishte duke punuar në Londër pasi kaloi një javë në ‘male’ në Francë pasi tri përpjekje për të kaluar Kanalin u bllokuan nga autoritetet që shpuan varkat. Teksa bëri përpjekjen e katërt, ai duhej të shpëtohej nga roja bregdetare e Mbretërisë së Bashkuar pasi gomones së tij të mbushur i mbaroi benzina.

“Ne u mbajtëm për tri ditë në një qendër paraburgimi dhe më pas u transferuam në një hotel. Arrita të flas me të afërmin tim që erdhi dhe më mori nga hoteli. Unë jam duke punuar në një shtëpi kanabisi për të paguar paratë që kam marrë hua për të paguar udhëtimin me varkë”, tha ai.

Më shumë se 32,000 emigrantë kanë kaluar Kanalin Anglez me varka të vogla deri më tani këtë vit, më shumë se sa kanë kaluar gjatë gjithë vitit 2021. Kriminelët nga Ballkani po zgjerojnë gjithnjë e më shumë rrjetin e tyre të ndikimit, duke krijuar marrëdhënie të drejtpërdrejta me furnizuesit e kokainës në Amerikën Latine. Ndërkohë, një tjetër prej shqiptarëve i tha dokumentarit se ai përballet me kërcënimin e arrestimit nga policia së bashku me sulmet e bandave kriminale angleze që tentojnë të vjedhin drogën.

“Ata hyjnë në shtëpi për t’ju grabitur dhe për të marrë të gjithë punën që keni bërë për shumë javë. Të rrahin. Të lënë të paralizuar. Grabitësit ju hedhin acid në sy. Ndoshta mund të përballesh me vdekjen”, tregon ai.

Një i tretë, i cili tha se pagoi 4,500 £ për trafikantët për të kaluar Kanalin, zbuloi se si ai ishte marrë nga të afërmit pas tri ditësh në paraburgim dhe tani punon në të njëjtën fermë kanabisi.

“Ne qëndrojmë 24 orë të mbyllur në këtë shtëpi. U hedhim ujë bimëve. Kur temperatura është e lartë, i fikim dritat. Kur është ftohtë, vendosim temperaturën. Këto bimë zgjasin 55 deri në 60 ditë për t’u rritur. Kur hymë në ujërat e Mbretërisë së Bashkuar, moti u çmend dhe ne u përballëm me valë të mëdha. Uji hyri në varkë dhe ky ishte një rrezik i madh për t’u mbytur”, tha ai.

Muajin e kaluar deputetët kërkuan veprim urgjent për të ‘shtrënguar’ rrjetet e kontrabandës së njerëzve që nxjerrin miliona paund nga kalimet e rrezikshme të Kanalit. Thirrjet e tyre erdhën pasi një hetim i fshehtë në Daily Mail të së hënës ekspozoi një gangster shqiptar që drejtonte hapur tregtinë e ndyrë në Dunkirk. I njohuri si “Luani i Artë” fiton rreth 1 milion paund në javë duke dërguar emigrantë në Britani me gomone të dobëta. Ai u tha gazetarëve të paraqitur si klientë se mund t’i merrte për 4500 £ secili dhe premtoi se autoritetet britanike do t’u jepnin ushqim, batanije dhe gjithçka që u nevojiteshin përpara se t’i vendosnin në një hotel.

“Pas kësaj, ju mund të shkoni ku të doni”, tha ai./dailymail

---