“Hardh Fest”, mërgimtari vjen veçanërisht për këtë arsye nga Zvicra

Festivali “Hardh Fest” u kthye pas dy vjetëve pauzë shkaku i pandemisë, pavarësisht që edhe gjatë këtyre dy vjetëve u zhvilluan disa aktivitete.

Këtë vit, festivali do të shënohet përmes performancave të artistëve të shumtë çdo mbrëmje, ndërsa ditën do të ketë aktivitete të ndryshme, si gara për shtrydhjen e rrushit dhe demonstrimi i pjekjes së rakisë rreth kazanit.

Në vitin 2019, sipas statistikave të Policisë së Kosovës, ky festival solli rreth 70 mijë vizitorë, ndërsa organizatorët shpresojnë të kenë rreth 100 mijë vizitorë këtë vit.

Në mesin e vizitorëve është edhe Qerim Shtavica nga Rahoveci, i cili ka në pronësi rreth 2 hektarë vreshta.

“Është hera e tretë që marr pjesë në festival, kam ardhur veçanërisht për këtë arsye nga Zvicra”, tregoi Shtavica.

Një ndër synimet e “Hardh Fest” është promovimi i trashëgimisë kulturore të Rahovecit, duke i pasur në qendër vreshtarinë dhe promovimin e verës.

Vizitorët kanë mundësinë të qëndrojnë nëpër tendat e ngritura në pjesën e kampingut.

Ata mund t’i ndjekin edhe aktivitetet e mëngjesit gjatë tri ditëve të festivalit, i cili shënon fillimin e sezonit të vjeljes dhe mbledhjes së produkteve të vreshtarëve, shkruan REL, përcjell albinfo.ch.