Departamenti Amerikan i Shtetit: Suksesi i dialogut ndërmjet Kosovës e Serbisë, prioritet absolut i SHBA-së

Përpara vazhdimit të dialogut ndërmjet Prishtinë dhe Beogradit të udhëhequr nga BE-ja, SHBA-ja thotë se suksesi i negociatave të Brukselit është “prioritet absolut” për Shtetet e Bashkuara të Amerikës.

“Ne jemi të kënaqur që liderët e Serbisë dhe Kosovës do të takohen në Bruksel, si pjesë e një dialogu të ndërmjetësuar nga BE-ja. Ne e mbështesim plotësisht këtë dialog. Është e rëndësishme që ne besojmë se të dyja palët e përdorin këtë mundësi për të çuar përpara bisedimet e tyre për normalizimi i marrëdhënieve. Ky është prioriteti ynë. Ne dëshirojmë të shohim progres dhe zbatimin e marrëveshjes”, ka thënë gjatë ditës së djeshme zëdhënësi i Departamentit të Shtetit, Ned Price, për The Pavlovic Today.

Dialogu dhe kompromisi, thotë ai, nuk janë shenja dobësie, por janë thelbësore për arritjen e një marrëveshjeje për normalizimin e marrëdhënieve, e cila, thotë ai, është ende thelbësore si për Kosovën, ashtu edhe për Serbinë kur bëhet fjalë për aspiratat e tyre drejt BE-së.

“Shpresojmë që liderët në Serbi dhe Kosovë të kuptojnë rëndësinë e ecjes përpara, jo prapa, përmes dialogut të udhëhequr nga BE-ja”, tha ai.

Edhe pse SHBA, siç thotë ai, nuk po marrin pjesë në dialog, suksesi i këtyre bisedimeve është “prioritet absolut” i tyre.

Gjatë ditës së djeshme në Bruksel ka udhëtuar edhe zëvendësndihmësi i Sekretarit të Shtetit për Çështjet Evropiane dhe Euroaziatike, Gabriel Escobar.

Nga DASH i thanë Gazetës Online Reporteri.net se Përfaqësuesi i posaçëm amerikan për Ballkanin Perëndimor, Gabriel Escobar, udhëtoi në Bruksel “për ta mbështetur takimin e nivelit të lartë të 18 gushtit të dialogut të ndërmjetësuar nga BE-ja”.

Escobar nga Brukseli, ku kishte takim me kryeministrin Kurti dhe presidentin serb, Vuçiq, tha se shpreson në një marrëveshje, e cila ruan sovranitetin dhe pavarësinë e Kosovës dhe gjithashtu parandalon dhunën.

Kurti e Vuçiq do të takohen sot Bruksel, me fillim nga ora 10:30. Ky takim do të ndërmjetësohet nga Shefi i Diplomacisë së BE-së, Josep Borrell, i dërguari i BE-së për dialogun Kosovë-Serbi, Miroslav Lajçak.

Një marrëveshje të mundshme në takimin e sotëm e ka paralajmëruar Përfaqësuesi Evropian për Dialogun Kosovë-Serbi, Miroslav Lajçak.

---