Pas Bernës, edhe në Kreuzlingen: Dy raste të difterisë në Qendrën e Azilit

Testet janë kryer pas rastit që ndodhi në Qendrën Federale të Azilit në Bernë ku, një javë më parë  pati raste të difterisë së faringut

Dy raste të difterisë së lëkurës janë konstatuar në Qendrën Federale të Azilit në Kreuzlingen, Kantoni Thurgau, transmeton albinfo.ch.

Banorët e tjerë janë kontrolluar për difteri, raporton portali informativ “FM1Today”. Testet janë kryer pas rastit që ndodhi në Qendrën Federale të Azilit në Bernë ku, një javë më parë  pati raste të difterisë së faringut.

Difteria është një sëmundje infektive e shkaktuar nga bakteri Corynebacterium diphtheriae. Ekzistojnë dy lloje të difterisë: difteria respiratore dhe difteria e lëkurës. Vetëm e para është e rrezikshme.

Difteria në Zvicër është zhdukur në vitin 1983

Patogjeni prek kryesisht traktin e sipërm respirator dhe disa lloje të baktereve prodhojnë një toksinë (toksina e difterisë) që mund të çojë në komplikime të rrezikshme dhe dëmtime afatgjatë në sëmundje.

Difteria është e përhapur në mbarë botën, por është zhdukur në Zvicër në vitin 1983, falë vaksinimit masiv të popullatës.

---