Hapja e eksporteve të grurit ul çmimet, rënie rekord pas vitit 2008

Çmimet globale të ushqimeve ranë ndjeshëm, me 8.6 për qind në fund të muajt korrik në krahasim me qershorin. Për Organizatën e Kombeve të Bashkuara për Ushqimin dhe Bujqësinë, kjo është rënia më e madhe mujore që nga viti 2008.

Bursat ranë mënjeherë në fund të korrikut pas marrëveshjes së Ukrainës dhe Rusisë në Turqi për të hapur rrugët e grurit nga portet ukrainase. Dërgesat e para ndikuan në lehtësimin e presionit të çmimeve.

Si një indeks kyç që mat ndryshimet mujore në çmimet ndërkombëtare të një shporte mallrash ushqimore, Indeksi i Çmimeve të Ushqimit të FAO-s ishte mesatarisht 140.9 pikë në korrik, që përfaqëson rënien e katërt mujore radhazi.

FAO bën të ditur se marrëveshja për eksportet e grurit po jep sinjale pozitive për të transportuar produktin më të rëndësishëm në ato vende që po vuajnë nga kriza e urisë.

Megjithatë, ekspertët thonë se pasiguritë ekzistojnë ende, kryesisht për plehrat kimikë, të cilat mbartin një çmim shumë të shtrenjtë.

Indeksi i Çmimeve të Ushqimit të FAO-s bazohet në çmimet në mbarë botën për 23 kategori të mallrave ushqimore që mbulojnë çmimet për 73 produkte të ndryshme./Euronews