Automjeti ushtarak zviceran bie në humnerë, humbin jetën dy persona

Sipas zëdhënësit të ushtrisë, automjeti qarkullonte në emër të Shoqatës Zvicerane të Shoferëve Ushtarakë, një shoqatë profesionale jashtë detyrës

Një aksident me fatalitet ka ndodhur në Sustenstrasse në drejtim të lokalitetit Wassen. Një kamion ushtarak është përplasur me parmakët mbrojtës të rrugës, transmeton albinfo.ch. Më pas kamioni ka depërtuar nëpër parmakë dhe ka rënë rreth 220 metra poshtë, në terrenin e pjerrët, bën të ditur Policia e kantonit Uri.

Kamioni është përmbysur dhe rrotulluar disa herë – dy pasagjerët, praktikisht janë katapultuar nga vetura.

Dy burrat e moshës 51 dhe 57 vjeç kanë pësuar lëndime të rënda dhe, për pasojë kanë humbur jetën në vendngjarje. Kamioni ishte një mjet ushtarak që drejtohej si pjesë e një aktiviteti jashtë detyrës.

Aksidenti ka ndodhur rreth orës 15:20 të së shtunës. Rrjedha e saktë e aksidentit është objekt i hetimeve që po vazhdojnë, të cilat po kryhen nga policia e kantonit Uri nën drejtimin e prokurorisë publike të Urit. Në detyrë ishin Rega, ekipi i kujdesit Uri, brigada e zjarrfikësve Wassen, mbrojtja kimike e Urit, , si dhe prokurori publik Uri dhe policia e kantonit Uri.

Sipas zëdhënësit të ushtrisë Daniel Reist, automjeti ishte në qarkullim në emër të Shoqatës Zvicerane të Shoferëve Ushtarakë (VSMMV), një shoqatë profesionale jashtë detyrës, transmeton albinfo.ch. “Kjo shoqatë ka rreth 5500 anëtarë, disa prej të cilëve janë ende në shërbim të ushtrisë dhe disa nuk janë më”, tha Reist për 20 minuten.

Shoqata bën udhëtime transporti për ushtrinë dhe kryen trajnime për shoferë jashtë detyrës: “Ata përdorin automjete të ushtrisë për të trajnuar shoferë të mundshëm. Kjo vlen si për anëtarët e ushtrisë që tashmë janë duke u trajnuar për t’u bërë shoferë motorikë dhe si përgatitje për trajnimin e shoferëve të motorëve në ushtri.” VSMMV gjithashtu mbështetet pjesërisht nga qeveria federale.

---