Bie papunësia në Zvicër

@pixabay

Gjatë tremujorit të parë 2022 numri i të punësuarve në Zvicër u rrit me 1.7% dhe shkalla e papunësisë, e përcaktuar nga Organizata Ndërkombëtare e Punës (ILO) ra nga 5.8% në 4.6%.

Gjithashtu, numri mesatar i orëve të punës nga të punësuarit u rrit me 2.8%, shkruajnë mediat zvicerane, përcjell albinfo.ch.

Shkalla e përgjithshme e papunësisë në Zvicër deri në fund të tremujorit (4.6%) ishte shumë më e ulët se norma në gjithë BE-në (6.5%).

Një total prej 5.1 milionë njerëz punonin nga një popullsi prej 8.6 milionë. Rritja më e madhe e punësimit ishte tek të huajt, pjesëmarrja e fuqisë punëtore e të cilëve u rrit me 4.1% krahasuar me shtetasit zviceranë, pjesëmarrja e të cilëve u rrit me 0.5%.

Papunësia në mesin e punëtorëve të rinj (15-24) gjithashtu ra nga 8.8% në 7.2%. Në gjithë BE-në 14% ishin të papunë në këtë grupmoshë në fund të tremujorit të parë të 2022-ës.