Miliona certifikata Covid skadojnë së shpejti në Zvicër

Çfarë do të ndodhë më pas?

Meqenëse certifikatat janë të vlefshme për nëntë muaj pas dozës së dytë të vaksinës ose një përforcues, “miliona certifikata zvicerane Covid do të skadojnë më së voni deri në vjeshtë”, sipas 20 Minute, përcjell albinfo.ch.

Meqenëse shumë vende kërkojnë ende një certifikatë vaksinimi për hyrje, dhe pasi raundi i dytë i përforcuesve nuk është ende i disponueshëm në Zvicër, kjo do të thotë se një numër i madh njerëzish mund të mos jenë në gjendje të udhëtojnë jashtë vendit.

Dhe, ndërsa vendet e tjera tashmë kanë filluar të administrojnë injeksione të dyta përforcuese, autoritetet shëndetësore zvicerane po zvarriten, duke mos lëshuar ende një rekomandim për dozën e katërt.

Kjo shqetëson disa deputetë, të cilët i bëjnë thirrje qeverisë që të vërë në dispozicion përforcuesit e dytë sa më shpejt të jetë e mundur.

“E kaluara ka treguar se kantonet nuk janë gjithmonë mjaftueshëm të përgatitur. Diçka e tillë nuk duhet të ndodhë më”, tha deputeti Fabian Molina, duke shtuar se kushdo që udhëton jashtë duhet të jetë në gjendje të rivaksinohet.

Një tjetër deputete, Yvonne Feri, vuri në dukje se qeveria federale dhe kantonet duhet të përgatiten për të vaksinuar përsëri brenda një periudhe të shkurtër kohore.

---