Në Kosovë më shumë rrymë humbet se që importohet, humbjet më të larta në Mitrovicë

Keystone (AP Photo/Mark Duncan)

Me 56.2%, Mitrovica prin në listën e rajoneve me humbjet më të mëdha energjetike, pasuar nga Peja me 25.95%.

Sipas raportit të Zyrës së Rregullatorit për Energji për vitin 2021, rreth 24.57% (apo 1.54 gigavatë) e energjisë elektrike në Kosovë humbet në rrjetin e shpërndarjes.

Gjysma e kësaj vlerësohet si humbje teknike, ndërsa gjysma tjetër si humbje komerciale (që përfshin konsumin e paautorizuar të energjisë).

“Humbjet teknike në rrjetin e shpërndarjes ende janë mjaft të larta, dhe në vitin 2021 kanë qenë 12.46%, kurse konsumi i paautorizuar i energjisë (më tutje në tekst humbjet komerciale) përbëjnë 12.11 % të kërkesës në shpërndarje, prej të cilës energjia e pafaturuar në katër komunat veriore të Kosovës përbën 5.95 % (372 GWh)”, thuhet në raportin e Zyrës së Rregullatorit për Energji për vitin 2021, raporton Kosovo.Energy.

Vlera e energjisë së humbur është më e madhe se sasia e përgjithshme e energjisë elektrike të importuar në vitin 2021, që ishte diku rreth 1.31 gigavat orë energji elektrike, raporton Kosovo.Energy.

Edhe përkundër investimeve të realizuara deri më tani në rrjetin e shpërndarjes, humbjet e energjisë elektrike ende mbeten të larta dhe paraqesin problem shqetësues për sektorin e energjisë elektrike.

Humbjet po ashtu kanë ndikim negativ edhe në furnizimin e konsumatorëve dhe qëndrueshmërinë financiare të operatorëve të furnizimit dhe shpërndarjes, si dhe tërë sektorin e energjisë.

Kostoja e humbjeve të energjisë elektrike deri në nivelin e përcaktuar nga rregullatori mbulohet nga tarifa e konsumatorëve.