Oligarku rus aplikon për ndihmë sociale zvicerane për shkak të sanksioneve

Një oligark rus në kantonin zviceran të Gjenevës ka aplikuar për ndihmë sociale

Një oligark rus në kantonin zviceran të Gjenevës ka aplikuar për ndihmë sociale shtetërore, pasi humbi aksesin në llogaritë e tij bankare për shkak të sanksioneve të vendosura pas luftës në Ukrainë. Zvicra e refuzoi kërkesën, përcjell albinfo.ch.

Gazeta zvicerane Tribune de Genève raportoi të mërkurën se oligarku, i cili ka nënshtetësi zvicerane, u ankua se së shpejti nuk do të ishte në gjendje të blinte sendet e tij ushqimore në supermarketin zviceran Migros për shkak të sanksioneve.

Zyra e mirëqenies sociale në kantonin e Gjenevës i tha gazetës se aplikimi u refuzua, pasi oligarku kishte pasuri të tjera, duke përfshirë pasuri të paluajtshme. Gjeneva është një nga tregjet më të shtrenjta të pronave në botë.

Ndihma sociale vihet në dispozicion vetëm për ata që nuk kanë mundësi të përballojnë shpenzimet, në vend të atyre që kanë probleme me likuiditetin si rezultat i sanksioneve ndërkombëtare.

Burri është një nga më shumë se 1000 individë që u nënshtrohen sanksioneve në Zvicër për shkak të pushtimit të Ukrainës nga Rusia. /Albinfo.ch

---