Bie fuqia blerëse e familjeve zvicerane

Një familje me dy fëmijë rrezikon 'të humbasë' më shumë se 3000 franga mesatarisht gjatë një viti,

Raportohet se një familje me dy fëmijë rrezikon ‘të humbasë’ më shumë se 3000 franga mesatarisht gjatë një viti, sipas përllogaritjes së Sindikatës Zvicerane (USS), njofton albinfo.ch.

Për një person të vetëm, humbja do të shkonte në 1600 franga.

Thuhet se kjo rënie e fuqisë blerëse mund t’i fajësohet rritjes prej 8 deri në 10 për qind të primeve shëndetësore, si dhe çmimeve më të larta të energjisë dhe inflacionit, tha presidenti i USS, Pierre-Yves Maillard.

“Klasa e mesme dhe familjet me të ardhura të ulëta ka të ngjarë të vuajnë” më së shumti, tha ai, duke shtuar se subvencionet që u paguhen njerëzve në nevojë do të duhet të rriten me 10 për qind, në mënyrë që të kompensohen humbjet.

---