Kompanitë nga Kosova promovojnë produktet në panairin “Fruit Logistica” në Berlin

Kosovo Investment and Enterprise Support Agency - KIESA

Bëhet e ditur se shtatë kompanitë nga Kosova: EURO FRUTI, FUNGO, BOOST BERRIES, HIT FLORES, SANTE FRUIT, BERRY KODE dhe JONI-SH, nga data 05 prill 2022 po i promovojnë produktet e tyre në panairin ndërkombëtar “Fruit Logistica 2022”, që po mbahet në Berlin të Gjermanisë, shkruan albinfo.ch.

Njëherësh po zhvillojnë kontakte me pjesëmarrës dhe blerës potencialë me qëllim të krijimit të bashkëpunimit, rritjes së prodhimit dhe të eksportit.

Vlen të theksohet se shtandi i Kosovës ka një hapësirë ekspozuese prej 119 m2 dhe po frekuentohet nga vizitorë dhe pjesëmarrës të shumtë, të cilët po shprehin interesim për produktet e kompanive tona nga industria e pemëve dhe frutave të freskëta e të ngrira, fruta mali, fruta të imta dhe organike, boronica, mjedra, dredhëza, kërpudha etj.

Pjesëmarrja e kompanive kosovare në këtë panair është organizuar nga Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA).

Gjatë vitit 2020, në panairin ndërkombëtar “Fruit Logistica” prezantuan më shumë se 3,300 ekspozues nga 91 vende dhe morën pjesë rreth 73,000 shitës dhe vizitorë tregtarë të 135 vendeve nga mbarë bota. /Albinfo.ch