Rusia kërcënon Bosnjën

Nëse tenton të futesh në NATO, do e pësosh si Ukraina

Një zyrtar i lartë rus ka deklaruar se Bosnjë e Hercegovina mund të pësojnë fatin e Ukrainës, nëse bashkohen me aleancën ushtarake të NATO -s, përcjell albinfo.ch.

Deklarata e fortë u dha të enjten, ku ambasadori i Rusisë në Bosnjë e Hercegovinë, Igor Kalbukhov, tha se vendi ishte i lirë të bënte zgjedhjen e tij në lidhje me NATO-n, por paralajmëroi se Kremlini do të “përgjigjej”.

“Nëse Bosnjë e Hercegovina vendos të jetë anëtare e ndonjë aleance, kjo është një çështje e brendshme. Përgjigjja jonë është një çështje tjetër”, tha ai për Ftv.

Këto kërcënime, sipas Ambasadës së Shteteve të Bashkuara të Amerikës në Sarajevë, janë të rrezikshme, të papërgjegjshme dhe të papranueshme.

“Asnjë palë e tretë nuk ka fjalë në marrëveshjet e sigurisë ndërmjet NATO-s dhe vendeve sovrane. Ne do të vazhdojmë të qëndrojmë me vendosmëri në krah të Bosnjë e Hercegovinës, ndërsa ajo ndërmerr hapat e nevojshëm për të siguruar vendin e saj në komunitetin euro-atlantik të kombeve”, thuhet në njoftimin e Ambasadës Amerikane në Twitter.

 

---