Coop-i heq nga raftet artikujt ushqimorë rusë

Coop-i dhe Globusi aktualisht nuk blejnë më asnjë produkt nga Rusia. Ndërsa Migrosi ende nuk ka vendosur të bojkotojë produktet ruse

Koncernet zvicerane të shitjes me pakicë kanë nisur reagimin e tyre ndaj luftës në Ukrainë. Kështu ndërmarrjet e mëdha Coop dhe Globus aktualisht nuk blejnë më asnjë produkt nga Rusia, stoqet e mbetura po shiten, transmeton albinfo.ch. Ndërsa Migros-i, nga ana tjetër, është në pritje.

Coop-i pra, ka vënë “vijën e kuqe” mbi produketet ruse. Shitësi i dytë më i madh me pakicë në Zvicër (pas Migrosit) hedh nga raftet e tij artikujt ushqimorë nga Rusia.

“Për shkak të situatës aktuale, Coop ka vendosur që për momentin të ndalojë furnizimin me ushqime nga ky vend i origjinës. Stoqet ekzistuese janë ende duke u shitur për të shmangur mbeturinat e ushqimit” thotë një zëdhënëse e Coop, e pyetur nga 20 minuten.

Nga kjo ndalesë në fakt vetëm një pjesë e vogël e produkteve janë prekur, pasi Coop-i blen fare pak artikuj ushqimorë nga Rusia, përcjell albinfo.ch. Më të përfaqësuarit këtu ishin dy lloje të vodkës dhe peshku i ngrirë.

Migrosi nuk heq dorë

Migrosi aktualisht nuk është duke bojkotuar produktet nga Rusia. Me rastin e blerjes së produkteve nga jashtë, Migros vazhdon të ndjekë rekomandimet zyrtare. “Deri më tani, Këshilli Federal nuk ka vendosur bojkot ndaj mallrave ruse”, thonë në këtë kompani.

Migrosi aktualisht po ndjek këtë procedurë dhe po vëzhgon nga afër dhe me shumë shqetësim zhvillimet. “Kushdo që, për bindje personale, preferon të mos blejë ushqime nga Federata Ruse, sigurisht që mund ta bëjë këtë falë deklaratës transparente të origjinës, të shtypur në paketim”, thuhet në njoftimin për media nga Migrosi.

Globus-i vepron sikur Coop-i

Ndërmarrja tjetër e madhe e shitjes me pakicë, Globus, ka  marrë të njëjtin vendim si Coop-i. Departamenti i mallrave ka gjithsej 15 produkte nga Rusia në departamentin e ushqimit “Delicatessa”, transmeton albinfo.ch. Globusi tani heq dorë nga porositë e reja, ka thënë një zëdhënëse.

Produktet e prekura janë një lloj mjalti me hoje, havjar beluga dhe lloje të ndryshme të vodkës. Sipas Globusit, 80 për qind e shitjes së produkteve ruse vijnë nga shitja e vodkës.

---