Dyfishohen infektimet me COVID-19 në Itali

(KEYSTONE/Ti-Press/Elia Bianchi)

Italia ka raportuar 259 vdekje nga coronavirusi dhe ka shënuar 170,844 raste të reja në 24 orët e fundit. Një ditë më parë, ky shtet kishte raportuar 140 vdekje dhe 68,052 infektime.

Ministria e Shëndetësisë ka thënë se Italia ka shënuar 138,045 vdekje që nga shpërthimi i pandemisë në muajin shkurt të vitit 2020, dhe ka raportuar 6.57 milionë raste deri sot.

Pacientët e shtrirë nëpër spitalet e vendit, pa përfshirë ata që janë në kujdes intensiv, janë 12,912  në krahasim me 12,333 një ditë më parë.

Në Itali, afër 80 për qind e popullsisë janë vaksinuar me dy doza të vaksinës dhe rreth 30 për qind kanë marrë dozën përforcuese të vaksinës kundër coronavirusit.

Qeveria italiane në fund të vitit 2021, ka vendosur kufizime edhe për udhëtarët, përfshirë edhe ata brenda Bashkimit Evropian.

Të gjithë qytetarët duhet t’i nënshtrohen testit për coronavirus përpara se të udhëtojnë.