Disa nga liderët e BE-së s’e duan Ballkanin Perëndimor pjesë të unionit

(KEYSTONE/Martin Ruetschi)

Kryeministri i Sllovenisë, Janez Jansa, në fund të presidencës së BE-së shprehet se unioni po tregohet oportunist kur vjen puna për Ballkanin Perëndimor.

Sipas tij, një nga liderët e BE-së gjatë një debati ka shfaqur hapur rezerva për anëtarësimin e vendeve të rajonit në BE,

Ai ka theksuar se interesat nacionaliste janë pengesë për vizionin e një Evrope të bashkuar dhe të lirë.

Gjatë një interviste për media lokale, ai shprehet se vendi i tij arriti të ndryshonte termin nga “perspektivë evropiane” në “perspektivë për anëtarësim” për vendet e Ballkanit Perëndimor.

“Një nga sukseset strategjike është se e kemi rikthyer zgjerimin në tavolinë si një çështje strategjike për BE-në”, tha ai.

Sipas Jensa, BE duhet të tregojë qartë se duhet të zgjerohet në Ballkan, sidomos duke parë atë që po ndodh në Lindje.

“Duhet të lëmë pas iluzionin se gjërat mund të zgjidhen vetë. Nëse BE s’do të zgjerohet, atëherë dikush tjetër do ta bëjë”, tha kryeministri slloven.

‘Kundërshtarë’ të zgjerimit ai cilësoi disa nga anëtarët e vjetër të BE-së, pa përmendur ndonjë vend konkret./Euronews