Ignazio Cassis u zgjodh President Federal për vitin 2022

Rezultati zgjedhor i Ignazio Cassis është më i ulëti që nga viti 2013, kur Ueli Maurer qe zgjedhur President Federal me 148 vota

Këshilltari Federal (ministri) Ignazio Cassis u zgjodh President Federal për vitin 2022 me 156 vota të fituara. Asambleja e Bashkuar Federale ja ka konfirmuar kështu postin e presidentit politikanit të FDP-së pasditen e së mërkurës.

Për herë të parë që nga Flavio Cotti në vitin 1998, një këshilltar nga Kantoni i Ticinos është zgjedhur President Federal, transmeton albinfo.ch.

Cassis ka qenë Shef i Departamentit Federal të Punëve të Jashtme (EDA) që nga 1 nëntori 2017, kur dhe është zgjedhur në Këshillin Federal.

Edhe në atë post ai ka qenë kandidati i parë nga kantini i tij, që nga zgjehdja e Flavio Cotti-t në vitet `90 të shekullit të kaluar.

Procedura e zgjedhjes ka rrjedhur kështu: Janë shpërndarë 237 fletë votimi, janë kthyer gjithashtu 237, përcjell albinfo.ch. Bosh ishin 36 sosh ndërsa të pavlefshme, 4.

Rezultati zgjedhor i Ignazio Cassis është më i ulëti që nga viti 2013, kur Ueli Maurer qe zgjedhur President Federal me 148 vota.

Alain Berset u zgjodh nënkryetar i Këshillit Federal.

Zgjedhja e presidentit dhe nënpresidentit federal në Zvicër bëhet me rotacion: për çdo vit në këtë kohë, deputetët e dy dhomave, të tubuar në Asamblenë Parlamentare votojnë kandidatin për këtë post, i cili vjen nga Këshilli Federal, shkruan albinfo.ch. Pra, njëri nga ministrat merr rolin e “të parit ndër të parët” për një vit, duke mbajtur resorin që drejton në qeveri.

---