Kurti: Po fillon epoka kur Serbia mësohet me reciprocitet

Kryeministri i Kosovës, Albin Kurti, deklaroi ditën e sotme se reciprociteti i targave të automjeteve është vendosur mes Kosovës dhe Serbisë.

“Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë, pa dallim, do t’iu mbulohet po ashtu simboli i tyre në territorin e shtetit tonë”, tha kryeministri në një postim në Facebook.

Kurti shpjegoi se me largimin e postblloqeve në Jarinje dhe Bërnjak, Njësia Speciale e Policisë së Kosovës nuk ka pse qëndron atje dhe se policia kufitare në vijim do të zbatojë reciprocitetin e targave.