Nis viti i ri shkollor në Kosovë dhe Shqipëri

(KEYSTONE/Alexandra Wey)

Ministrja e Arsimit të Kosovës, Arbërie Nagavci, ka bërë të ditur se janë bërë përgatitjet e duhura për të filluar vitin e ri shkollor dhe se mbi 90% e mësimdhënësve dhe stafit tjetër që punon në shkolla janë vaksinuar.

MASHTI ka hartuar udhëzuesin për organizimin e procesit mësimor në kushte të pandemisë COVID-19, i cili parasheh 4 skenarë për zhvillimin e procesit mësimor, varësisht nga situata epidemiologjike dhe kushtet specifike në shkolla.

Megjithëse skenari më i preferuar është ai për rikthim në shkolla me prani fizike, në rast se në ndonjë shkollë situata epidemiogjike është më e rënduar, task-forcat në nivel komune mund të marrin vendim për të kaluar në ndonjë nga skenarët e tjerë.

Përveç mësimit me prezencë fizike janë bërë edhe përgatitjet për organizimin e mësimit online, në rast nevoje.

MASHTI, në bashkëpunim me UNICEF, ka ofruar për të gjitha shkollat mundësinë e qasjes në platformën mësimore www.shkollat.org, të bazuar në teknologjinë e Microsoft, ku, përveç sistemit për menaxhimin e mësimit në distancë, janë publikuar edhe video-mësimet sipas programit mësimor të klasave 1-9.

Sot, me respektimin e masave kundër COVID-19 edhe në Shqipëri, rreth 480 mijë nxënës në sistemin parauniversitar në të gjithë vendin do të nisin sot vitin e ri shkollor. Mësimi ishte parashikuar të fillonte më datën 13 shtator, por Ministria e Arsimit vendosi që të shtyhej për në datën 27, duke e bërë mësimin fakultativ deri më këtë datë.

Ministrja e Arsimit, Evis Kushi, përmes një video të shpërndarë në rrjetet sociale ka uruar nxënësit për nisjen e vitit të ri shkollor dhe i ka këshilluar të zbatojnë masat kundër COVID-19.

“Urim për të gjithë nxënësit që nisin nesër vitin e ri shkollor, bashkë me angazhimin për të bërë gjithmonë më të mirën që ata të kenë një vit sa më të mbarë e të suksesshëm. Suksese të gjithëve”, shkruan Kushi.

Mësimi do të zhvillohet me një deri në katër turne ndërsa orët do të zgjasin nga 25 deri në 45 minuta në varësi të kapacitetit të shkollës.

Në ndryshim nga viti i kaluar, mësuesit do të rikthehen në klasa të vaksinuar, ndërsa për ata që nuk e bëjnë, do të duhet të paraqesin testin për COVID-19 çdo javë për të treguar se nuk janë të infektuar nga virusi.