Gastronomia pret humbje prej 25 për qind për shkak të certifikatës

"Ne preferojmë  detyrimin për certifikatë më mirë se një bllokim të tretë", thotë një gastronom. Por ai llogarit deri në 25 për qind më pak të ardhura

Siç është njoftuar tashmë, Këshilli Federal po zgjeron masivisht detyrimin për certifikatë. Nga e hëna, më 13 shtator, të gjithë atyre që mësyjnë kinematë, qendrat e fitnesit dhe ambientet e  brendshme të restoranteve u kërkohet certifikata se janë vaksinuar, testi negativ ose janë shëruar.

Për këtë arsye, ofruesit e shërbimeve të përmendura presin një rënie të madhe të qarkullimit.

Gastrosuisse shpreh keqardhje për vendimin: “Ai është joproporcional dhe çon në trajtim të pabarabartë të popullsisë”, thotë për 20minuten.ch presidenti i saj, Casimir Platzer. Ai pret humbje masive shtesë në qarkullim.

Por, ka të tjerë në këtë sektor që mirëpresin vendimin e Këshillit Federal: “Ne preferojmë  detyrimin për certifikatë më mirë se një bllokim të tretë”, thotë Manuel Wiesner, i cili drejton me vëllain e tij kompaninë “Familie Wiesner Gastronomie”, transmeton albinfo.ch.

Por ai megjithatë llogarit deri në 25 për qind më pak të ardhura.

Operatorët e fitnesit gjithashtu presin pasoja të rënda për bizneset e tyre: “Ne presim se do të humbasim rreth 20 deri në 25 për qind të klientëve tanë”, thotë Claude Ammann, president i Shoqatës Zvicerane të Fitness dhe Shëndetit.

Kjo ndodh sepse ata nuk duan të vaksinohen ose të testohen vazhdimisht. Ammann thotë se është ende plotësisht e paqartë nëse do t’ua kthejnë atyre paratë e abonimit ose do ta ndërpresin abonimin, përcjell albinfo.ch.

“Kursimet tona janë bosh – ne nuk kemi shumë hapësirë ​​për t’i akomoduar këta klientë”

Vetëm të vaksinuarit dhe të shëruarit, në kinema?

Në sektorin e kinemasë, e cila gjithashtu është prekur, ekziston frika e rënies së numrit të shikuesve: “Në Francë, numri i shikuesve ka rënë me 70 për qind menjëherë pas futjes së detyrimit për certifikatë”, thotë René Gerber nga shoqata ProCinema.

Ai supozon se vetëm ata që janë vaksinuar ose shëruar do të vijnë tani në kinema: “Vetëm fare pak njerëz do të bëjnë testin enkas për të parë një film – veçanërisht nëse testi do të duhet të paguhet, nga tetori”.

---