Dita e parë e shkollës në Austri: 123 nxënës dalin pozitivë me koronavirus

490,000 nxënës nga tri shtete federale të Austrisë janë kthyer sërish në klasa. Por, më shumë se 100 nxënës prej tyre, megjithatë, ditën e parë të shkollës e përfunduan në karantinë

Viti i ri shkollor për 490.000 nxënës filloi të hënën, me një “fazë sigurie” trejavore në Vjenë, në Austrinë e Ulët dhe Burgenland, shkruan oe24.at.

Në këtë kohë, nxënësit detyrohen të bëjnë testin e Covid 19 tri herë në javë, ndërsa jashtë klasës duhet të mbahen maskat. Sipas shifrave paraprake, më shumë se 100 vetëteste pozitive u regjistruan në ditën e parë të shkollës në tri shtetet federale, përcjell albinfo.at.

123 teste pozitive

Në Vjenë, sipas shifrave të Drejtorive të Arsimit, 80 teste rezultuan pozitivë, 35 në Austrinë e Ulët dhe tetë nxënës në Burgenland. Kjo ishte përafërsisht e njëjtë me numrin e testeve pozitive nëpër shkolla të rezultuara në fund të muajit maj. Megjithatë, këto fillimisht konsiderohen raste të dyshimta dhe duhet të konfirmohen me teste PCR.

Këshilltari i Qytetit të Vjenës për Arsimin, Christoph Wiederkehr, (NEOS) tha para gazetarëve të hënën se në fillim kishte pritur më shumë raste pozitive. Sidoqoftë, ai supozon se këto shifra do të rriten ndjeshëm në javët e ardhshme.

Ndërkohë ministri i Arsimit, Heinz Fassmann, gjatë vizitës në një shkollë në Vjenë ishte optimist se mësimi do të zhvillohet ballë për ballë gjatë tërë vjeshtës. “Përveç optimizmit, duhet edhe durim kur rritet numri i infeksioneve”, tha ministri.

---