Gjermani: Moshat e reja kryesojnë në rastet e reja me COVID-19

Shumica e rasteve të reja me COVID-19 në Gjermani janë adoleshentë dhe të rinj

Instituti Robert Koch (RKI) bëri të ditur se rastet e reja janë rritur veçanërisht në mesin e personave në të 30-at dhe më të rinj, ndërsa kanë mbetur të ulëta te të rriturit e moshës mbi 60 vjeç.

Incidenca më e lartë 7-ditore u regjistrua në ata midis moshës 20 dhe 24 vjeç (59 raste për 100 000 banorë), ndërsa ishte më e ulëta në mesin e grupmoshave mbi 60 vjeç (më pak se 10 raste për 100 000 banorë), transmeton AA, përcjell Albinfo.ch.

Lehtësimi i masave kundër koronavirusit dhe i kufizimeve të udhëtimit besohet të ketë kontribuar në rritjen e rasteve të reja te të rinjtë.

RKI raportoi 5 578 raste të reja me COVID-19, dita e dytë radhazi që rastet e reja kalojnë shifrën 5 000.

Sipas shifrave zyrtare, numri i rasteve aktive u rrit në 42 900, nga 39 500 që ishte dje, por numri i të shtruarve në spital dhe numri i vdekjeve kanë mbetur relativisht të ulëta.

 

---